Radius: Off
Radius:
km Set radius for geolocation
Search

ಜೆಡಿಎಸ್‌ ಮುಖಂಡ ಮದನ್‌ರಿಂದ ಏಕಪಕ್ಷೀಯ ತೀರ್ಮಾನ: ಆರೋಪ

ತೀರ್ಥಹಳ್ಳಿ : ಪಕ್ಷ ವಿರೋಧಿ ಚಟುವಟಿಕೆಯಲ್ಲಿ ತೊಡಗಿರುವ ತಾಲೂಕು ಜೆಡಿಎಸ್‌ ಅಧ್ಯಕ್ಷ ಆರ್‌.ಮದನ್‌ ಅವರನ್ನು ತಕ್ಷಣ ಹುದ್ದೆಯಿಂದ ಕಿತ್ತು ಹಾಕುವಂತೆ ರಾಜ್ಯ ಜೆಡಿಎಸ್‌ ಮುಖಂಡ ಡಾ.ಹೊಸಕೊಪ್ಪ ಅರುಣ್‌ ಆಗ್ರಹಿಸಿದರು.

ಗುರುವಾರ ಪಟ್ಟಣದಲ್ಲಿ ಸುದ್ದಿಗೋಷ್ಠಿಯಲ್ಲಿ ಅವರು ಮಾತನಾಡಿ, ಪಕ್ಷ ಸಂಘಟನೆಯಲ್ಲಿ ಹಲವು ವರ್ಷಗಳಿಂದ ಸಕ್ರಿಯವಾಗಿರುವ ಅನೇಕರನ್ನು ದೂರ ಇಟ್ಟು ವೈಯಕ್ತಿಕ ಹಿತಾಸಕ್ತಿ ತೋರುತ್ತಿರುವ ಮದನ್‌ ಏಕಪಕ್ಷೀಯ ತೀರ್ಮಾನ ತೆಗೆದುಕೊಳ್ಳುತ್ತಿದ್ದಾರೆ. ಪಕ್ಷದ ಆಯಕಟ್ಟಿನ ಹುದ್ದೆಗಳಿಗೆ ಒಕ್ಕಲಿಗ ವರ್ಗದವರನ್ನು ಹೆಚ್ಚಾಗಿ ಪದಾಧಿಕಾರಿಗಳನ್ನಾಗಿ ನೇಮಿಸಿದ್ದಾರೆ. ಕ್ಷೇತ್ರದಲ್ಲಿ ಈಡಿಗ ವರ್ಗ ಪ್ರಭಾವಿಯಾಗಿದ್ದರೂ ಪಕ್ಷದಲ್ಲಿ ಯಾವುದೇ ಹುದ್ದೆ ಕೊಟ್ಟಿಲ್ಲ ಎಂದರು.

ಮಾಜಿ ಪ್ರಧಾನಿ ದೇವೇಗೌಡರು, ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರು ತೀರ್ಥಹಳ್ಳಿ ಕ್ಷೇತ್ರ ಮತದಾರರ ಕುರಿತು ಅಪಾರ ನಿರೀಕ್ಷೆ ಹೊಂದಿದ್ದಾರೆ. ಡಿಸಿಸಿ ಬ್ಯಾಂಕ್‌ ಅಧ್ಯಕ್ಷ ಆರ್‌.ಎಂ. ಮಂಜುನಾಥಗೌಡ ಅವರನ್ನು ಅಭ್ಯರ್ಥಿಯನ್ನಾಗಿ ಘೋಷಿಸಿ ಉತ್ತಮ ತೀರ್ಮಾನ ತೆಗೆದುಕೊಂಡಿದ್ದಾರೆ. ಆದರೆ, ಬಿಜೆಪಿಯೊಂದಿಗೆ ಒಳ ಸಂಪರ್ಕ ಇಟ್ಟುಕೊಂಡು ಪಕ್ಷದ ಅಭ್ಯರ್ಥಿಗೆ ಮೋಸ ಮಾಡಲು ಹೊರಟಿರುವ ಮದನ್‌ ತಾಲೂಕು ಅಧ್ಯಕ್ಷ ಹುದ್ದೆಯಲ್ಲಿರಲು ಯೋಗ್ಯರಲ್ಲ ಎಂದು ಟೀಕಿಸಿದರು.

ಚುನಾವಣೆಯಲ್ಲಿ ಜೆಡಿಎಸ್‌ನ ಮೂಲ ಕಾರ‍್ಯಕರ್ತರು ಪಕ್ಷಕ್ಕೆ ಬೆಂಬಲ ನೀಡುತ್ತಾರೆ. ಮದನ್‌ ನಾಯಕತ್ವದಲ್ಲಿ ಪಕ್ಷಕ್ಕೆ ಭವಿಷ್ಯ ಇಲ್ಲ ಎಂಬುದನ್ನು ನಾಯಕರು ಮನಗಾಣಬೇಕು ಎಂದು ಅರುಣ್‌ ಹೇಳಿದರು.

ಮುಖಂಡ ಕೋಣಂದೂರು ಅಶೋಕ್‌ ಮಾತನಾಡಿ, ಪಕ್ಷ ಯಾರ ಮನೆ ಸ್ವತ್ತಲ್ಲ ಎಂಬುದನ್ನು ಆರ್‌.ಮದನ್‌ ಮೊದಲು ಅರ್ಥ ಮಾಡಿಕೊಳ್ಳಬೇಕು. ಪಕ್ಷ ಸಂಕಟದಲ್ಲಿದ್ದಾಗ ಕ್ಷೇತ್ರದಲ್ಲಿ ಸಂಚರಿಸಿ ಪಕ್ಷ ಕಟ್ಟುವ ಕೆಲಸ ಮಾಡಲಾಗಿದೆ. ಮದನ್‌ ಅವರಿಗೆ ಪ್ರತಿಸ್ಪರ್ಧಿಗಳ ರಾಜಕೀಯ ಭವಿಷ್ಯ ಮುಖ್ಯವಾಗಿರುವುದರಿಂದ ಪಕ್ಷಕ್ಕೆ ಹಿನ್ನೆಡೆ ತಂದಿದೆ. ಪಕ್ಷದ ನಾಯಕರು ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸದಿದ್ದರೆ ಬೇರೆ ದಾರಿ ಕಂಡುಕೊಳ್ಳುವುದು ಅನಿವಾರ‍್ಯ ಎಂದರು.

ಜೆಡಿಎಸ್‌ನಲ್ಲಿ ಮದನ್‌ ಜ್ಯೂನಿಯರ್‌..

ಜೆಡಿಎಸ್‌ನಲ್ಲಿ ಮದನ್‌ ಜ್ಯೂನಿಯರ್‌ ಆಗಿದ್ದು ಅವರಿಂದ ಪಾಠ ಕಲಿಯುವ ಅಗತ್ಯವಿಲ್ಲ. ಮೂಲ ಕಾರ‍್ಯಕರ್ತರು ಸಭೆ ಸೇರಿದರೆ ಪೋಲಿಸ್‌ ಠಾಣೆಗೆ ದೂರು ನೀಡುವ ಮದನ್‌ ಅವರಿಗೆ ಪಕ್ಷ ಕಟ್ಟುವ ರಾಜಕಾರಣದ ಗಾಂಭೀರ‍್ಯತೆ ಇಲ್ಲ. ಜೆಡಿಎಸ್‌ ವಿಚಾರ ಮಂಟಪ ವೇದಿಕೆ ರಾಜ್ಯ ಸಂಚಾಲಕನಾಗಿ ಕಾರ‍್ಯನಿರ್ವಹಿಸಿರುವ ತಾನು ಪಕ್ಷದಲ್ಲಿ ಸೀನಿಯರ್‌ ಎಂಬುದು ಮದನ್‌ ಅವರಿಗೆ ಗೊತ್ತಿರಲಿ ಎಂದು ಹೊಸಕೊಪ್ಪ ಅರುಣ್‌ ಎಚ್ಚರಿಸಿದರು.

ಜನಪರ ಹೋರಾಟ, ಸಾರ್ವಜನಿಕ ಸೇವೆಯ ಮೌಲ್ಯ ಮದನ್‌ ಅವರಿಗೆ ಗೊತ್ತಿರಲು ಸಾಧ್ಯವಿಲ್ಲ. ಪಕ್ಷಕ್ಕೆ ದುಡಿದವರನ್ನು ದೂರ ಇಡಲು ಪಟ್ಟಿ ಸಿದ್ಧ ಮಾಡುತ್ತಿರುವ ಸರ್ವಾಧಿಕಾರಿ ಧೋರಣೆಯಿಂದ ಅವರ ಬೌದ್ಧಿಕಮಟ್ಟ ಅಳೆಯಬಹುದಾಗಿದೆ. ಮದನ್‌ ದಿಢೀರ್‌ ರಾಜಕಾರಣಿ ಹೊರತು ಜನಪರ ಕಾಳಜಿ ರಾಜಕಾರಣಿ ಅಲ್ಲ.

Leave a Reply

Your email address will not be published. Required fields are marked